Ve contarò fati tristi, curiosi e alegri. Fati sucessi in Asol che go vissù, che i me ga contà e che go catà scrit su dei libri de qualche storico.
   Lesendo sti libri me son inacort che sti storici conta le robe un fià diverse un da chealtro, parché, penso mi, ognun vede a vicenda dal só belcon; comunque sarà diverso el modo de contar ma la sostansa del fatto resta quela.
   Par i foresti (cioè no Asolani) digo che la me parlata sarà in dialeto Asolan stret (ma un fià modernisà). Me scuso, ma tratandose de argomenti dela nostra çitadina me sento in dover de doparar el me dialeto.


I NOBILI ASOLANI - Tra el 1338 e el 1459 i aministratori de Asol i gera un fià massa orate pro me. I podestà tirava acqua par el só muìn in maniera massa vergognosa. Le tasse comunai gera alte e la popolassion tirava cinghia.
   La Serenissima par vegnirghe incontro ai poret, che gera sempre i pì tartassai, ghe ga calà el dassio da 14.000 a 10.000 ducati.
   Finalmente in te'l 1459 xe stat elet un Consiglio de 32 membri e 'na Giunta de 13. Tuti omeni di "eletto costume ... incorruttibili, esperti e sempre disposti a sacrificar il privato per il pubbilco interesse ...".
   Questo gera scrit sul regolamento, ma in pratica la musica gera sempre quela. El bel xe che ste persone da elegiar le doveva essar scelte fra quele che, da generassion, no le doveva aver "esercitato arte meccanica", cioè no le doveva aver mai lavorà! Par de pì le doveva far parte del "ceto nobile" e essar iscrite in te quela lista, fata ancora in te'l 1338, ciamada el LIBRO D'ORO, dove non podeva essar iscriti, in modo assoluto, i poret.
   Par sta rason, avendo la nostra çità 'na aministrassion cussì elevada, ai abitanti del centro i ghe ga dat la nomea de NOBILI ASOLANI.

1547 - LA STRAGE DEGLI EBREI - Ghe gera in Asol 'na quarantina de ebrei che viveva in via Belvedere. Le gera çinque famejie: de Anselmo dei Grassini, de Salomon l'orefice, de Marco Jacob ciamà Marcuzzo, de Jacob detto Jacobin e de Mosè. Lori gera obligai de portar 'na baretina zala par distinguarli dai cristiani.
   In Asol no ghe gera sinagoghe e le funsion religiose se tegniva in casa de Marcuzzo; 'pena fora dela porta del Colmarion ghe gera el simitero, picol, reçintà e tegnù ala só moda.
   Sti ebrei gaveva l'autorisassion dala Serenissima de esercitar l'usura, ma, ciò, i gaveva dei interessi massa alti e le scadense massa curte. Pensé che par i Asolani del centro par soli trenta dì i toleva un agio del 48 par çento e par quei de fora del 72 par çento. Par soli trenta dì!
   Oltre che l'usura i ebrei gaveva invià anca un comercio che 'ndava da l'oro fin ale pezze da piè che gaveva dei prezzi spudorai. La regina Cornaro la gaveva ciamà parfin el Beato Bernardino da Feltre par vedar se el gera bon de sorar ste sanguissughe, ma poc el ga giovà.
   La zent la gera quasi tuta poreta e el bisogno la spenseva a domandar qualche prestito o vendar chelcossa e sti pori can, come i se impegolava co sti strossini, i se catava davanti a l'inflessibile insensibilità dei Uficiai del Comune che vegniva in casa a sequestrarghe par inadempiensa quele quatro tole del let e dela cusina.
   Da ani durava sta storia fin un çerto Paolo Pupo, Asolan, se ga metù in ment de farghela pagar a sti giudei. Co 'na passiensa da farghe rabia a Giove, el ga parecià un piano par rivar al só scopo. El ga trovà diversi scavezot che'l ghe gaveva promes de spartir i tesori dei ebrei e tra sti tosatan ghe gera anca Toni Parisot da Pagnan, archibugero, sempre col s-ciop in man e svelto col cortel e sempre pronto a menar le man.
   Pupo ga vù un merito, se cussì se pol ciamarlo, quel de aver savù tasar sul piano che'l gaveva architetà, e sul dì de la vendeta e, par de pì, mantegnir e farghe mantegnir el segreto a tuti.
   Dopo tanti pareci el ga deciso che sto dì fusse el 22 de novembre 1547, festa del compatrono dela Diocesi de Treviso, festa granda.
   El ga ordinà ai congiurati de 'ndar par le boteghe o par le case dei ebrei co indifarensa, fasendo finta o de vendar chelcossa o de domandar proroghe o qualche prestito novo.
   Cussì xe stat fat e a 'na çerta ora in casa de Anselmo xe scumisià la carneficina a són de bastonae e de smanerae, e da là la se ga sparpagnà sule altre case del ghetto e ognuna la xe stata sachejada co "diligensa".
   Zighi, urli, sbudeament, sangue da par tutt! Quei che assaliva urlava, quei che subiva urlava pì forte ancora terorisai. Un macelo!
   Co' xe finì la sfuriada, par l'intervento dei soldai, dodese ebrei gera stati fati fora, oto gera pì de là che de quà, feriti da no contar.
   La giustissia la xe stata tremenda e sensa compassion. Le preson se ga impenì, po' tortura, squartamenti e forca xe state le pene par i pì scalmanai.
   Toni Parisot e altri só compari pendolava sul Monforca e Pupo ... gera sparì, nessun ga savù pì gnent. Bruta storia!

LA STRAGE DE SANTA MARIA DEI BATTUTI - Del 1620 la Confraternita de Santa Maria dei Battuti ga pensà de far un altar de piera in Domo. I Castaldi voleva metar 'na tassa par aver schei subito, i fabrissieri e el Preosto, invesse, voleva spetar de farli su co le elemosine.
   Sto fato ga fat nassar 'na gran dicussion e ga diviso el paese in dó: chi tegniva par i Castaldi, chi tegniva par el Preosto.
   Man man che passava el temp, la tension aumentava sempre pì fin che al 30 de novembre xe s-ciopà el putiferio.
   Colpi de archibugio, pugnalae, sciabolae e gran sigament ga causà tre morti e un mucio e feriti. I pì scalmanai xe scampai tuti e la giustissia a li ga condanai tuti, assolvando quei che xe restai in çità. Na bela giustissia!
   Tra quei scampai ghe gera un çerto Francesco Beltramini, ciamà el Pretino, che el xe stat sassinà a Ferara, dove che'l se gera rifugià, da un de chealtro "partito" che se ciamava Mano.
   El fradel del Pretino, Andrea, par vendicarlo el xe 'ndat in çerca dì e not fin che'l lo ga trovà e là lo ga sassinà de paca. No content el ghe ga tajià 'na man e la ga portada in Asol come trofeo.
   'Na sera el ga organisà 'na gran çena e, dopo arquanti bocai de vin, Andrea el la ga tirà fora el mozzegot de man troncada al Mano e el la butava par le tole in mezo a l'alegra compagnia.
   'Na bela alegria!

LA PIRAMIDE - El 1700 xe stat un secol de calma e i consiglieri del comune no savendo catar qualche scusa par far barufa tra de lori, parché gnent ghe gera da dir e gnent ghe gera da far, i se sforsava de trovar chelcossa de original da deliberar che dasse in te l'ocio.
   Pensa che te ripensa e sentì cossa che ghe xe vegnù in ment. I ga pensà de fabricar un monumento che podesse maravejiar el mondo e che ricordasse ai posteri il prestigio di quel secolo.
   El conte Piero Pellegrini-Trieste ga proposto de far, a spese publiche, 'na piramide, come quele de l'Egito, fabricada sul montesel da drio el Monte Ricco, e la doveva essar granda compagna, se no de pì, de la Rocca.
   La discussion ga durà ore, ma, par fortuna, co' i ga mandà le delibare par la ratifica a Venessia, el Consiglio dei Dieci ga insabià la pratica.

EL CAMPANON - Del 1774 xe stat deliberà la spesa (dise la cronaca) par riparar ... la rottura accaduta alla Campana dell'orologio nella Pubblica Torre ... Considerando necessaria a dirigere tutte l'acioni de Cittadini con l'hore che suona, come a preservacione d'infortuni d'incendi ... ed altre pubbliche occorrenze ... .
   A sto scopo xe stat incaricà Coradin Tosio, artefice, ... vedendo però essere questo di molta esperienza, bontà speriamo facile di convenirsi discretamente ... . Anca 'lora i 'ndava a sparagnar!
   Su sta delibara gera scrit: " ... quella Campana necessaria a dirigere tutte l'acioni dei Cittadini con l'hore che suona ... " . Ve spiego cossa che vol dir sto "dirigere" dela campana , che la zent ga sempre ciamà campanon.
   Secondo 'na delibera fata ani in drio, el campanon sonava quatro volte al dì: ale nóve, a mezodì, e dó volte dopomezodì, l'ultima gera ciamada l'ora de note.
   Cossa voleva dir ste sonae ? Eco qua:

• el campanon dele nóve gera el segnal dela marenda;
  
• el campanon de mezodì dava el segnal del disnar;
  
• el primo campanon del dopomezodì dava el segnal del marendin;
  
• el campanon dela sera dava el segnal de chiusura dele boteghe e dele porte dela çità.
  

   Le dó sonae del de dopomezodì le 'ndava drio el temp de l'ano a tre ore de distansa una da chealtra.
   Scomisiando da metà de Dicembre la prima gera ale quatro e la seconda ale sete de la sera e man man che'l temp passava e le giornae se slongava, le sonae vegniva ritardae de meza ora al mese, a partir da Febraro. In te i mesi de Giugno, Lujio e Agosto la prima sonada gera ale sié dela sera e la seconda ale nóve, par dopo tornar man man a Dicembre come prima.
   I conta che 'na volta el campanon sonava anca ala matina bonora e sto segnal gera ciamà la sveglia.
   Sta tradission uncó xe stata abandonada, pecà!

1804 - VISITA DE L'ARCIDUCA GIOVANNI - Un bel dì xe rivà da Vienna la notissia che l'Arciduca Giovanni saria vegnù in Asol in "visita ufficiale".
   Sta notissia ghe ga fat vegnir el morbin al Comune. Tuti xe stati mobilitati par i preparativi e l'Aministrassion par l'ocasion gata fat dele spese da orbiróe.
   Sentì: 25 para polastri, 5 para indi, scóe, cadini, mastele, fascetti, pignatti, corde, cordella, stampe de Remondini, biglietti da visita, un abito de seda nero con cordon a fiocchi, 20 aquile di carta, carta e tela di tutti i colori, 3 candeli, un paro scarpe perline, chiodi, legname ... .
   Co' tutt gera pronto l'Arciduca no xe rivà, parché la visita gera programada par Asola in provincia de Mantova e no in Asol.
   I asolani xe restai co tuti i só pareci comprai par gnent.

1848 -EL REGISTRO DELE SPIE - Se sa che quando 'na ciacola gira se ingradisse, e man man che la passa de bocca in bocca la deventa vera.
   La domenega de Pasqueta, verso le nóve de matina, 'na gran calca de contadini se ga inmucià davanti a l'"Ufficio Commissariale", sigando a pieni polmon: "Fora el registro dele spie!".
   El popolo credeva che sto registro esistesse sul serio, ma el gera fruto dele ciacole scaturie da qualcun che gaveva ciapà dele multe dai commissari. "Fora el registro dele spie!" gera l'urlo sempre pì alt.
   Né l'autorità, né la Guardia Civica ga fermà ste furie che le xe 'ndate dentro pai ufici rabaltando cassei, toe e tutt quel che ghe gera par çercar sto maletto libro.
   No i ga trovà gnent e 'lora pì infuriai de prima i ga ciapà i impiegati e i li ga portai in piassa e li ga fati insenociar davanti a un tavolin co sora el Crocifisso in mezo a dó candele impisae, obligandoli a giurar che no ghe gera registri de spie. A sto punto 'na persona sensada ga mandà a tor 'na mastela de vin dala só cantina e el la ga messa a disposission del popolo.
   Come d'incanto la musica xe cambiada e tuti se ga mess a svodar i bocai desmentegandose del registro e sigando "Evviva el donator".

1830 - DELIBERE IGIENICHE - In te quei ani l'igiene no xe che la fusse osservada co diligensa, ansi. El Comune, stuf de mandar le guardie a far rispetar la "publica decenza" ga costituì 'na commission par "l'igiene, la decenza e la pulizia".
   Ve riporto qualche stralcio dele relassion che sta comission ga presentà a l'Aministrassion:
   La commissione " ... visitate le strade interne di questa Città e l'esterno dei caseggiati trova che: ... i portici nel soffitti sono ingombri e zeppi di ragne, che dovrebbero essere tolte per tutto il loro corso: quelle imposte (i belcon) che sono appiccicate orizzontalmente con ancini e che sono periclitanti, sarebbe bene che fossero assicurate ... Le insegne di qualche bettola costituita da una semplice frasca mostrando l'indecenza sarebbe bene che fossero tolte ...
   ... E' vietato lavare (sotto le fontane pubbliche) qualunque sorta di drappi dall'Ave Maria della sera a quella del mattino sotto pena di immediato arresto o multa ...(e là gera dita che chi che voleva lavar 'ndasse o al Levrer o al Gorgo, el lavatoio 'pena fora de Porta Aurelia) ... mentre per le decenze dovrebbe esser vietato un tal tollerato lavacro anche di giorno ... .
   (Sicome che l'ora gera abitudine de doparar i porteghi come secer) xe stat proibì ... l'uso di macellare e squartare i suini e gli altri animali sotto i Portici che servono di pubblico passaggio ...
   Proibì anca ... di lavare cose immonde nelle pubbliche Fonti di immergere sozze biancherie ed oggetti sudici nelle due Pilette ... e desistere di esporre sui balconi dei drappi imbrattati da lordure di fanciulli e non sottoposte a bucato ...
   Insoma, dei bei pazzoni gera sti Asolani!

1841 - CONSUMO DE L'OIO PAR L'ILUMINASSION - In Comune la spesa par l'iluminassion, che'lora gera a oio, gera sempre causa de batibechi.
   Sicome che i vari farai gera de grandesse diverse no gera boni de far el calcolo preciso del consumo.
   Xe stat incaricà Pellegrini-Trieste e Albertini, dó consiglieri, de far la prova de quant che fusse el "costo orario" par l'iluminassion.
   Sti dó onorevoli se ga mess de anema e, dopo aver pensà come far, i se ga fat portar in sala del Consiglio tuti i farai de la çità.
   El verbal presentà, fra e altre robe, el diseva: ... e misurato l'olio occorrente per empirli si fecero ardere per il periodo preciso di un'ora dopo la quale venne vuotato l'olio rimasto e misurato si rinvenne la differrenza tra la prima e la seconda misurazione ... per cui l'importo dell'olio che va in un'ora consunto da tutti i fanali accesi ascendono a Cm 44.
   Gereli o no gereli meticolosi ?

I CANON ANTITEMPESTA - Asol xe sempre stat un posto da tempesta, purtropo no passava ano che no la vegnisse anca dó tre volte. Un bel dì el Consiglio Comunal ga deciso de comprar dei canoni fati a posta par scongiurar la tempesta.
   No i gera fati come quei dei soldai, ma i pareva 'na impiria bislonga co la boca larga che vardava par aria montada su 'na spezie de cassonet de aciaio col só oturator e la camara de scopio. I li cargava co la polvar e po' sparava par aria mirando ale nuvole quele che i stimava fusse piene de tempesta.
   L'inventor diseva che la canonada provocava 'na corente de aria calda che gavaria desfà la nuvola evitando la pestada.
   I Asolani se ga diviso in dó: i favorevoli che sostegniva che l'omo gera finalmente rivà a domar la natura e chealtri convinti che'l Comune gavesse spendù i schei par gnent.
   Però tuti no vedeva l'ora che vegnisse el temporal par godersela, i primi par aver sodisfassion, chealtri par tor par el culo i ilusi.
   Sti canon i xe stati messi in bateria tutt torno Asol e co scomisiava qualche temporal ghe gera rente ogni canon "l'artiglier" pronto a far fogo, riparà dentro el casotel fat de canop.
   El temporal tant desiderà dai Asolani xe rivà verso la fine de Majo, drio mezodì. El se ga fat sù sora a val de Santa Fià e po' el xe vegnù pian pian sora Asol.
   "Fogo" sigava i capi famejia da soto el portego e i adetti al "pezzo" tirava la cordeta e BUM e po' carga in pressa e BUM. La pareva 'na guera.
   Le nuvole xe passae, negre fa'l carbon, ma no xe cascà gnanca un gran de tempesta.
   Credendo de averghela fata tuti contenti i ringrassiava la bona anema che gaveva inventà sti canon. Ma el temp, forse ciamà pentì, el xe tornà in drio pì vioento de prima e co'l xe stat sora Asol el ga molà zo l'ira de Dio. I canon 'lora i ga scomisia a sparar de tuta anema, ma pian pian no se ga sentì pì gnanca un colpo.
   I se gaveva impenì de tempesta!

1925 - CAMPANE NÓVE - Monsignor Brugnoli forsa de farghine el ga convint i fabrissieri de cambiar le campane dela cesa, parché, secondo lu, le doveva essar pì bele, pì grande e che sonasse mejio. I veciot gera afessionai a quele vece, ma el Preosto diseva che le gaveva un "suono un po' pettegolo e stridulo".
   Co le xe state messe sù i conta (forse la xe sol 'na ciacola) che qualcun gaveva protestà in Comune par el gran bordelo che faseva le campane nóve e pareva che i dovesse metterghe dei belcon, dala banda dela piassa, par smorsar el sóno. Ma tut xe 'ndat finir su 'na canarina.
   Al Preosto ghe xe vegnù el similton co'l ga sentì che 'na persona che gaveva "recia" el dixeva in giro che la campana pì céa gera un fià stonada. El ga ciamà de paca el Maestro Malipiero e el lo ga mandà sul campanil. Là co un martelet el ga scomisià batar campana par campana. Dopo 'na bona meza giornada de bati e scolta el xe vegnù zo e el ga dita al Preosto che la pì céa "calava di un quarto di tono, almeno".
   El consiglio che el ghe ga dat xe stat o de cambiar batocio (pì pesante) o "si potrebbe rimediare tagliando (con qualche mezzo meccanico) del metallo".
   El Preosto no ga fat gnent par riparar la campana, ma el ga ciapà sta scusa par debatarghe sul costo dele campane ala dita che le gaveva fabricae.
   El 2 de Febraro del 1926, don Gino Favero, incaricà de scrivar el certificato de collaudo el ga dita, tra l'altro, che le campane gera in DO diesis, RE diesis, e Mi diesis, ma el maestro Malipiero ga dita che le gera invesse in RE bemolle, MI bequadro e FA bequadro.
   Mah, sti musicisti!

EL PALASSO DEL MUNICIPIO - Del 1909 i ga trasportà el Municipio dal Palasso del Capitano, dove che ghe xe el Museo, su sto Palasso Beltramini (o Neruda) parché i diseva che el lógo el gera pì importante e pì decoroso.
   Ma no xe questo el fato che vui contarve, vui, invesse, farve notar la finessa architetonica che ga vù Giorgio Massari, l'architeto incaricà dai siori Beltramini, de progetar el fabricato.
   Se sa che tuti i architeti xe un fià strambi e Massari no sgarava, infati el progeto sula carta, talmente bel e armonioso, el 'ndava ben, ma se'l fusse stat fabricà cussì in te quela piasseta striminsia el saria stat sofegà.
   Pensa che te ripensa a l'architeto ghe xe vegnù 'na idea (da architeto): "Qua - el ga dita - bisogna che inverigole el palasso", e cussì el ga fat.
   Se vardè ben, vedaré che'l casamento xe voltà de sbiego verso man zanca in modo che quei che vien su da via Regina Cornaro i posse gustar tuta la magnificensa de l'opara.
   In Asolan se diria "Mia mona, l'architeto!", ma no posso dirlo in publico.

EL PALCOSCENICO DE LA GUERA - Bisogna che savei che le dó guere mondiali le ga interessà anca Asol co la só furia de distrussion. La prima parché la gera proprio da drio le prime retrovie: i combateva sula Piave e sul Grapa; la seconda parché sora Asol passava spesso e volentiera le samàe de "Liberatori" che 'ndava a scaricar i só confeti anca su qualche çità veneta o 'pena drio la corona dele Alpi.
   No sol par questo, ma anca parché, co' i "Alleati" ga conquistà Roma, tuti i uffici militari (che se ciamava Direzioni Generali) se ga incasà qua in Asol e in te l'Asolan.
   Ma la roba curiosa xe che in te la prima guera mondial, quando che l'esercito italian se ga trincerà sul Piave e sul Grapa, da Asol se vedeva benon i fumet de le granate e se sentiva el sordo brontolar dele s-ciopetae e dele canonae.
   In te ste ocasion la popolassion coreva bramosa sula porta del Colmarion a godarse el spetacol e i se la godeva un mondo, spezie se la bataglia vegniva de not. Pareva de vedar i foghi artificiai in distansa.
   Co' i gera stufi de vardar i 'ndava in let sodisfai.
   In te la seconda, invesse, (co' i bombardava Marghera, o Padova, o Treviso ... ) i 'ndava a godarse el spetacol su par la via de San Martin.
   Quela volta che i ga mitraglià Casela, proprio a la fine dela guera, i gera tuti in Tore e co' i aerei i se voltava par far la picchiata sula strada Bassanese, tuti saludava i piloti, che rispondeva al saluto, e po' bramosi de vedar l'assion i se precipitava sula mureta a vardar.
   Incossiensa e poc sentimento, me par mi.

LE OSTARIE - Fin dopo l'ultima guera, in Asol, in centro, ghe gera 23 tra alberghi, locande, cafè e ostarie. Altre quatro le gera 'pena fora de la porta.
   La pì part gera ciamada col nome del propritario o co la menda che'l gaveva, vedemole insieme:

• da Mimo in piazzot (Piazzzetta Salvo d'Acquisto) in contrada Santa Caterina, uncò sarada
  
• dala Lola su l'incrocio par 'ndar al Casonet
  
• da Menegon in prinsipio dei porteghi de contrada Canova, uncò sarada
  
• Macalé ostaria/cafè in contrada Canova (uncò ghe xe un negossio de stofe)
  
• dala Giudita davanti al munisipio, uncò Simonetti
  
• da Fàssio (ai Dó Mori) ostaria/locanda, prima in te na casa che gera in Piasseta Duse, 'ndata demolia e po' trasferia dove che la xe dess
  
• da Bastian ostaria/gelateria in via Regina Cornaro
  
• Caffè Commercio, via Regina Cornaro
  
• dal Ina (o da Feltrac) uncò ristorante "Ai Due Archi", via Roma
  
• Ostaria al Moreto (ciamada anca Ostaria de la tepa) uncò Ostaria Epoca (!)
  
• da Bresolin locanda/ostaria in via Dante, uncò uffici RAS
  
• Albergo al Sol (finalmente i lo ga vert da novo)
  
• da Cencio (o Ostaria ai Cessi) in Piazza Brugnoli (ciamada "Piassa Nóva" parché del 1874 xe stat demolì borgo Alòc par farghe spassio al marcà), uncò sarada
  
• Cafè Centrale (o Cafè Grando) 'na volta tabù specie par i contadini
  
• al Paradiso (ciamà al Bùss - al buso) albergo/ostaria, via Valcagnana
  
• dal Nora caffè in via Valcagnana, ancò sarà
  
• da Andrea Moreàt in Borgo Novel (via Browning) specialità vermut chinato, ancò Enoteca
  
• Pasticeria da Primo (Cremonese) uncò Cafè Teatro
  
• da Ferucio Pessater in Borgo Novel (uncò Oreficeria Damini)
  
• dal Bacaro, Borgo Novel (O Passeggero, fermati da Piero e bevi il vino nero)
  
• da Cice Magaton (attigua al Bacaro) uncò Gioielleria Vettorato
  
• da Marascalco ostaria/cafè,uncò Fioreria Panizzon
  
• Albergo alla Torre in via Marconi, uncò sarà.
  

   Quele fora dele porte gera:

• dala Pina de la Orba all'ospedale
  
• da Bacin, via Forestuzzo (da Buricio)
  
• da Pignatea via San Martino, uncò sarà
  
• da Curi (Ostaria al Bersagliere) via San Martino
  

   Le locande e le ostarie sora el banco gaveva squasi tute quatro bocai, dó bianchi e dó scuri. I bianchi gaveva uno el brusco e uno l'amabile de bianco de Mofum o dei Castei, i mori invesse gavela el clinto da Pagnan e el nostran dele rive.
   El modo de bevar gera diverso da quel de uncò, infati co' uno uno 'ndava in ostaria lu sol l'ordinava un quart; se i gera in dó sempre un quarto, in tre 'na meza (mezo litro), in quatro 'na meza, in çinque un litro ... e via de sto passo.
   Co' i zugava le carte i ordinava mezo litro a partia e de solito le partie gera tre: dó trisete e 'na briscola.
   A quei tempi le ostarie gera 'na spezie de "Schola Cantorum", parché ala domenega e ale feste "comandate", dopo Messa Granda, te sentivi tute le violote dei nostri veci.

EL MARCÀ - Del 1258 el Comune ga stabilì che el marcà fusse fat de sabo, prima el gera 'na confusion del demonio.
   'Lora el marcà el gera de gran intaresse par la zona, parché Asol el gera 'na çitadina importante, e da ela dipendeva tuti i paeset dela pedemontana.
   In prinsipio schei no si ghi n' vedeva circolar parché tut gera fat col barato. Ste femenete rivava co sestei pieni de ovi, coi pitusset, co verdure, co qualche fruto e le scambiava la merce co altri generi che no podeva essar fati in casa.
   Co'l passar del temp el marcà se ga sistemà trovando el só postejo fisso par ogni genere, cussì fin prima de l'ultima guera questo gera l'ordine dele barache:

• su par 'ndar in Tore, dal pal dela bandiera ala porta del Teatro, ghe gera el marcà dele piegore. Se vede ancora su par el muro le s-ciorane dove che i le ligava;
  
• in Pavejon (Piazza del Municipio) e via Vescovado (via Dante) ghe gera el marcà dei formaji;
  
• su par 'ndar a l'Albergo al Sol ghe gera el marcà dei polam e dei ovi;
  
• in Piassa Nova (Piazza Brugnoli) ghe gera el marcà del bestiame, el foro boario;
  
• in fianco ala zona dela cesa, 'pena sora le scalete, ghe gera el marcà dele semense e del gran;
  
• in via Roma ghe gera le stofe;
  
• in via a Regina Cornaro ghe gera le scarpe, atressi in fero par i contadini, semense par i fior, e (soto la loza del Museo) ombrèe, barete e capei;
  
• in piassa verdure fruti e altre mercansie;
  
• in via Bembo, dala farmacia a dove che finisse la salita ('na volta là ghe gera el loto) ghe gera el marcà dei porsèi.
  

   A quel temp l'igiene no esisteva, infati sule bancarele del formajo ghe gera dele nuvole de mosche che çercava de procurarse la marenda svolazzando sora el tul che mal quersiva i formaji.
   La esposission dei fruti gera fata su 'na querta destirada in tera, che dopo un toc i deventava bianchi dala polvar, e i gera tuti sparpagnai a mucet bersagliai dale ào che se la godeva a procurarse el sucaro dei datari o dei fighet sechi (che pareva folài, tuti su un paston). I diseva che i mori, prima de spedir i datari da l'Africa i li pressava coi i pié par farli star in te le seste.
   Ma la figura pì carateristica del marcà gera el venditir "ambulante", ambulanti nel senso che i 'ndava in giro par el marcà e i vendeva le robe pì impensae messe su 'na casseta che i gaveva davanti al stomego tegnua su da 'na cordela che ghe passava da drio ala copa. Sti venditori sigava la "bontà" dela só merce sgorlandosela davanti al naso ala zent par convinsarli.
   E po', co un lampo de "genio" la vecia aministrassion ga portà co la massima indifarensa el marcà a Casela. 'Na tradission che durava da 700 ani.

LA SDODOLA - 'Na volta te podevi dir che un ano gera fat de quatro stajon. Uncò bisogna dir che ghi n'è sol dó: istà e inverno; primavera e autuno xe sparìi del tutt.
   L'inverno de 'na volta scomisiava za in autuno, difati a scomisiar dai morti la çima del Grapa gera bianca e la restava bianca fin a Pasqua.
   Qua da noaltri l'inverno me presentava dele bele nevegae e la neve restava qua anca sie, sete dì; gera fredo e tuti i tosat, ma anca i veci, tirava fora el scariol (uncò i ghe ciama slitin) par far la sdodola, che vegniva pareciada su le strade un fià al pusterno: in Colmarion e zo par Baretina, zo par el forest del Casonet e par quel de Pagnan, zo par le Dorotèe (che 'lora gera in mezo ai albari), da Resei, a Sant'Ana, in Biordo ... insoma da par tutt.
   In qualche posto i faseva la gara dela galina: sula sdodola i tirava de travers un spago tegnù su da dó scalon e i ghe picava 'na galina par le zate, po' i ghe faseva un rialso sula sdodola, che serviva da trampolin, e co' i passava, fasendo un salt, i doveva çercar de ciapar la pora bestia par el col. Se i la tirava zo la gera sóa.
   In Asol le dó, tre sere che se ingiassava la neve, gera tutt un scariolar: putei, zovani, ansiani, tose e fémene i se destirava sul scariol e i sigava "Pista!".
   Le gera bele serate de alegria, ma qualche veciot, che sto giass ghe impediva de movarse, e qualche persona importante che no ghe 'ndava zo che el popolo podesse divertirse, un dì ga protestà in comune.
   El podestà, costreto dale circostanse, ga ciamà el capo stradin e el ghe ga dat ordine de spalar la neve da par tutt, da la Ponta del Forest ala Rialta de Sant'Ana. "No se ga da vedar un fioco de neve!".
   Quel poro can del capo el se ga mess de bona lena coi só stradini, ma la gera gréva la facenda, e el brontolava e a ogni spalada ghe scampava qualche mocol.
   I Asolani xe bagoloni nati e un de sti qua, sentendolo tonezar, el ghe ga dita: "Ti che te si anca capo dei pompieri, taca la manega de l'acqua e daghe pression forte che te vedarè che te la pari via tuta in te un lampo".
   El capo lo ga vardà fiss e dopo el ga tolt l'atresso e el ga fat netisia de neve, ma sicome che gera sereta, su l'imbrunir se ga ingiassà da par tutt, le strade gera come un vero.
   'Pena dopo çena la goduria dei scariolanti xe stata pì granda dele altre volte. Un bagolon par tor in giro el poro capo stradin, trovandolo in ostaria, el ghe ga dita: "Grassie dela sdodola".
   El ga fat 'pena ora de scampar!